Viena oscarizada

Nun m’alcuerdo mui bien cómo se llamaba’l protagonista de la hestoria a pesar de que vieno dellos años a clas conmigo na universidá. Yo, o meyor dicho nós, llamábemoslu Óscar porque l’actuación que tuvo na tarde que tuvimos en Viena mereció que-y dieren un premiu de l’academia hollywoodiense (naquellos díes de viaxe LA Confidencial ganara dellos oscars).

Aquella mañana madrugáremos la resaca pa garrar un bus y dir de Praga a Budapest (nel trescurrir del viaxe llegara a pañar una nieve que daquella cuasi nunca palpara); nel mediu parada en Viena pa visitar una ciudá que nós nun visitamos. Alcuérdome de caminar y caminar a la gueta de los xardinos del Belvedere; y cuasi más nada. Ficimos munches semeyes, rímonos muncho y baxamos toles cuestes pa volver al autobús. Nesa baxada foi cuando Óscar se separtó de nós y entamó l’actuación que lu diba llegar a la gloria, que diba facer que nun lu escayeciera.

Mientres nós díbemos a pol bus, ente rises,  caminando ensin ver;  Óscar siguió, cola ayuda d’un mapa, un camín que yá trazara nun se cuándo. Paseó per Karlplatz y pela Plaza Schwarzenbergplatz y el so soldáu rusu; visitó per  fuera’l parlamentu, la ópera y el palaciu imperrial y concluyó’l paséu garrando’l metro en Herrengasse pa, poco depués de cinco minutos llega hasta cerca d’onde nós lu esperábemos dende facía una hora pa siguir el viaxe.

Namás que lu vimos trenta persones tiráronse enriba d’él pa pidi-y esplicaciones; él púnxose blancu y entamó l’actuación que lu diba llevar a algamar un óscar. Baxaba con nós cuando se perdió ensin que nos decatáremos (hasta equí, quiciabes, too verdá), buscónos per tolos llaos ensin atopanos y tuvo la suerte d’atopar una parada de metro, pero nun se decató de pagar billete y tuvo la mala suerte de que cuando taba en metro apaeció’l revisor y quixo facelu pagar. Echó a correr hasta que llegó hasta que depués de tiempu foi atopanos.

La blancura d’Óscar fizo que después de danos esplicaciones se desmayara y lo tuvieren que subir, ente dellos pal autobús camín de Budapest. Cuando recuperó la so actuación mereció aplausos dientro l’autobús.

  • Ver mapa.
  • 72 hores en Viena con Vienna Card.
  • El metro de Viena (U-Bahn) tien cuatro llinies que trabayen, aproximadamente, de 5:00  de la mañana a 12 de la nueche: Colorada, Morada, Mariella y Verde. Ver horarios. Ver precios.

  • De Ranón a… Viena nun hai vuelu direutu y pa llegar hai que facer escala en Madrid (faciendo tol viaxe con Iberia o viaxando a Madrid con Ryanair), Barcelona (llegando a la capital catalana con Vueling o Ryanair; y d’ellí pa Viena con Austrian Airlines). L’Aeropuertu Wien Schwechat ta dieciocho kilómetros dal Este de la capital austriaca.
  • Del aeropuertu de Schwechat al centru pue llegase en tren, metro, autobús o taxi.

* El tren hai que garralu siguiendo, en Llegaes, nos cartelos mariellos colingaos del techu la pegatina de CAT. En 16 minutos, y por 9 euros compra online y 10 euros en Viena (i/v varia ente 16 y 18 euros) tas en Wien Mitte/Landstraße (U3/U4). Na estación de Mitte pue facese’l check- in y espedir la tarxeta d’embarque de munches compañíes.

Ver horarios. Al aeropuertu opera tolos díes de 5:38 h a 23:08 h, y al centru tolos díes de 6:05 h a 23.35 h.

* El metro (llinia S7) viaxa al centru en 26 minutos y por 3,60 euros. Llega a les estaciones de Mitte, Nord y Floridsdorf. Ver horarios. Al aeropuertu opera tolos díes de 4:31 a 23:46 h, y al centru tolos díes de 05:24 h a 00:18 h. Pa llegar al andén hai que siguir los cartelos mariellos qu’hai en Llegaes.
* El bus gárrase na terminal de llegaes siguiendo los cartelos mariellos colingaos del techu. Vienna Airport Lines viaxa por 7 euros al centru de la ciudá (Parada Morzinplatz/Schwedenplatz en 20 minutos. Al aeropuertu opera tolos díes a 0:30 h; 2:00 h; y dende les 4:00 h hasta les 23:30 h, cada 30 minutos. Y al centru tolos díes 01:20 h; 02:50 h; dende les 04:50:00 h hasta les 00:20 h, cada 30 minutos); a la Estación occidental y Estación Wien Meidling (el viaxe dura 45 minutos a la primera y 30 a la segunda. Al aeropuertu opera tolos díes de 5:00 a  23:00 h  cada 30 minutos dende la Estación occidental  y de 05:15 h a  23:15 h  cada 30 minutos dende Wien Meidling. Y a les estaciones tolos díes, cada 30 minutos, de 06:00 a 23:59 h).

* El taxi gárrase na salida K3 de la terminal de salíes y tien un preciu aproximáu de 32 euros. Más información equí.

  • La ruta dura aproximadamente dos hores (anque depende de lo que paremos énte cada monumentu), y entamen nos parques y los palacios Belvedere (U1. Parada Südtiroler Pl.), residencia de branu del príncipe Eugenio de Saboya.

Los parques yá merecen la pena la visita pero nos palacios atópense obres d’arte. Nel Altu Belvedere hai arte austriacu dende la Edá Media hasta anguaño; destacando les obres de Klimt (como ‘El besu’. Nel Baxu Belvedere puen visitase los escepcionales cuartos de gala de la dómina y delels esposicioens temporales.

Los palacios abren de 10 a 18 (el Baxu los miércoles hasta les 21 hores). Les entraes pa caún de los palacios val 11 euros y pa los dos en conxuntu 16 euros. Ver web.

Cruzando’l parque nun vamos tardar en llegar a Schwarzenbergplatz, que nun ye más qu’una plaza amplia con fonte (dacuando con lluces nel agua) pero hai muncho más yá que ye onde ta’l monumentu al soldáu rusu desconocíu que recuerda la lliberación de Viena del nazismu en 1945. tamién hai una estatua ecuestre del Príncipe Schwarzenberg, que venció a Napoleón en Leipzig en 1813.

Dende Schwarzenbergplatz yá vemos Karlplatz onde podemos ver dos estaciones de metro d’art nouveau (finales del sieglu XIX) que, anguaño, úsense como cafetería y como muséu de la obra del so constructor.

Na plaza tamién s’atopa la Kalrskirche, del sieglu XVIII llevantada n’honor de San Carlos Borromeo por mor de la so intercesión énte la peste. Ver web.

Non mui lloñe garrando les cais Getreidemarkt y Museumplatz aportamos al MuseumsQuartier, al barriu de los museos (llégase tamién garrando U2); l’octavu espaciu cultural más grande del mundu. Ocupa les vieyes caballerices del palaciu imperial.  Frente a la Plaza de Maria-Theresien tán los museos d’Hestoria Natural y el d’Hestoria del Arte. La parte moderna articúlase alredor del Leopold Museum y del Mumok (Muséu d’Arte Modernu). Pa los neños ta’l Dschungel Wien y el Zoom. Tamién hai espacios de exhibición temporal d’arte contemporaneu como’l Kunsthalle Wien, un centru de danza -el Tanzquartier-, estudios p’artistes residentes y estudios de producción. Ver web.

Pero a parte de los museos col bon tiempu la plaza central enllénase de xente que se sienta nos sofás de fibra de vidru. Tamién hai munches tiendes y restauranes.El Muséu d’Hestoria Natural abre de xueves a llunes de 9 a 18:30 hores; miércoles de 9 a 2 hores y martes cerrado, sacante 3 d’abril y 1 de mayu de 2012. La entrada val 10 euros. Ver web. Inaugurólu en 1891 l’emperador Xicu Xosé I. Espónense minerales, xemes, dinosaurios, fósiles, arte prehistóricu, animales dende protozoos a mamíferos (delles estinguíes y otres a nada d’ello). hai que destacar un esqueletu de Diplodocus, un topaciu de 117 kilos o la Venus de Willendorf.

El Museu d’Hestoria del Arte abre de martes a domingu de 10 a 18 (los xueves hasta les 21 hores). La entrada val 12 euros. Ver web. Inaugurólu en 1891 l’emperador Xicu Xosé I.

Les tres plantes del muséu guarden coleiciones d’arqueoloxía, escultura, artes aplicaes, armes, numismática y medallística. Tien la considerada meyor coleición mundial de Rubens y dellos retratos cimeros de Velázquez.

El Leopold Museum guarda l’antigua colección privada d’arte de Rudolf y Elisabeth Leopold; tien la meyor coleición d’arte modernu austriacu, y ye’l más visitáu del barriu de los museos.  Destaquen autores como Egon Schiele o Gustav Klimt.

Abre tolos díes menos los martes de 10h a 18h (los xueves hasta les 21 hores). La entrada val 11 euros. Ver web.

Entrar al Mumok, al Muséu d’Arte Modernu, val 9 euros y abre llunes de 14 a 19 hores; de martes a domingu de 10 a 19 hores; xueves de 10 a 21 hores. Ver web. Amuesa pintures, escultures, instalaciones, dibuxos, grafíes, semeyes, videos, películes, maquetes arquitectónique, pieces de diseñu…, ente la primer metá del sieglu XX hasta anguaño, atendiendo sobre manera a los años sesenta. Hai obres de Picasso, Warhol, Lichtenstein…

Nel Dschungel Wien hai teatru pa neños y adolescentes. Ver web. Abre de llunes a vienres de 14:30 a 18:30 hores; sábadu, domingu y festivos de 16:30 a 18:30 hores.

Al llau, el ZOOM Kindermuseum ufierta esposiciones, talleres, un estudiu de dibuxos animaos pa neños/es de 0 a 14 años. Pal programa y horarios hai que mirar la web.

Mui cerca del Barriu de los Museos ta’l Parlamentu al que s’entra detrás de la estatua de Pallas Athene (cai Karl Renner-Ring). Ufierta visites guiaes de 55 minutos n’inglés y alemán tolos díes, menos el domingu y los díes qu’hai sesión. Ver horarios. la entrada val 5 euros. Ver web.


Al llau ta Rathaus, la sede neogótica del ayuntamientu coronadar una aguya de 102 metros d’altor. Merez la pena colase dientro del edificiu.

Alredor del ayuntamientu hai un parque con escultures y árboles exóticos que, n’iviernu, alluga’l mercáu navidiegu, y en branu cine al aire llibre.

Hai que volver a pasar delantre del Parlamentu y de los edificios antiguos del Barriu de los Museos pa llegar a Burggarten, un parque (el del palaciu imperial) pa descansar que s’anima cuando l’atapacer ta p’aportar. Hai que destacar los antiguos invernaderos pa plantes exótiques qu’hai nel parque, anguaño cafetería y que lleva’l nome de Palmenhaus. Ver web del café.

Nuna de les esquines del parque atopamos Albertina, un muséu allugáu en dependencies del Palaciu Imperial, na residencia de los Habsburgo. Presenta una coleición d’arte gráficu con más d’un millón de grabaos y más de 60.000 dibuxos con obres de Durero, Cézanne, Klimt o los estudios de Rubens sobre neños. Tamién hai coleición de semeyes. Ver web. La entrada val 11 euros. Abre tolos díes de 10 a 18 hores (los miércoles hasta les 21 hores).

Frente al muséu ta’l Café Sacher onde se fai la más famosa tarta de chicolate de Viena con una receta secreta dende 1832. Abre dende les 8 de la mañana a mediodía. Ver web.

Hai qu’empobinase yá pal Palaciu Imperial al que vamos llegar al travier de Josefplatz que nos lleva hasta Michaelerplatz que nos enseña la grandiosidá del placiu. Al traviés d’un túnel llegamos a les coles que nos van llevar hasta l’interior.

El palaciu Imperial foi sede de la dinastía de los Habsburgo hasta’l final de la I Guerra Mundial. Dixébrase ente la parte más vieya, del sieglu XIII, el palaciu nuevu del sieglu XIX y l’ala Leopold del XVII. Visítense 76 sales: los aposentos reales (19 sales), les Cámares de la Plata, la Cacía y el Tesoru (29 sales), el Muséu Sisí (la emperatiz, muyer del emperador Xicu Xosé I; 28 sales incluyendo’l vagón imperial)y los xardinos de Heldenplatz.

1. Cuartos imperiales, Coleición de plata, Muséu Sisí; 2. Escuela de caballería; 3. Tesoru Imperial; 4. Capiella de la Corte Imperial; 5. Centru de Congresos habsburgo; 6. Biblioteca Nacional d’Austria, Muséu de Papiros, Coleición d’Instrumentos Musicales Vieyos, Coleición d’Armes y Armadures; 7. Muséu d’Etnoloxía; 8. Casa de la Palmera; 9. Albertina, Cuartos d’Estáu; 10. Cinemateca austriaca; 11. Ilesia de los Agustinos; 12. Biblioteca Nacional d’Austria, Sales d’Estáu, Cuartu de Llectura de los Agustinos; 13. -; 14. Palaciu Mollard Esperanto, Muséu Globe; 15. Muséu Austriacu del Teatru, Cuartos de l’Alcordanza; 16. Muséu d’Hestoria del Arte; 18. Muséu d’Hestoria Natural; 19. Barriu de los Museos.


Abre de setiembre a xunu de 9 a 17:30 hores y de xunetu a agostu de 9 a 18 hores. Hai entraes estremaes dependiendo les estancies que quieras ver. Pues informate equí. Ver web.

Frente a la puerta pela qu’entrasti al palaciu ta la Escuela d’Equitación, qu’ufierta espectáculos y exercicios con caballos. Dizse que ye la única escuela del mundu que sigue usando métodos tradicionales de destreza. Ver web. Les entraes puen comprase na web o na entrada de martes a domingu de 9 a 16 hores (los vienres con actuación hasta les 19 hores).

En Michaelerplatz frente a la entrada principal al palaciu Imperial ta Loos Haus, un edificiu de primeros del sieglu XX que-y gustó tan poco al emperador que se negó a volver entrar al palaciu per esa entrada y tapió les ventanes que daben pa esi llau. Hai qu’entrar, anque anguaño ye un bancu, pa ver cómo axunta lo cenciello colo elegante.

Mui cerca ta Josefplatz cola Ilesia de los Agustinos, onde se casaron Sisí y Xicu Xosé, y munchos otros emperadores. ye del sieglu XIV, y dientro ta la Cripta de los Corazones con 54 corazones de los Habsburgo n’urnes de plata. Ver web.

  • Otres rutes. Otros sitios.

* Pal Danubio. La ruta entamámosla más o menos onde acabamos l’anterior, en Michaelerplatz (U3. Herrengasse). Al traviés de Kohlmarkt entramos na ciudá vieya o iunnere stadt.

Caleyando, xirando a la izquierda en Heidenschub, llegamos a la plaza Am Hof (que significa “na corte” yá qu’equí tuvo la corte de los Babenberg), la más grande del cascu vieyu que nos adientra nel barriu xudíu. Na plaza hubo torneos.

Mui cerca d’equí ta la plaza de Judenplatz (ver mapa pa llegar). Un sitiu únicu pa l’alcordanza yá que nella ta’l Monumentu Conmemorativu (obra de Rachel Whiteread), les escavaciones de sinanoga medieval y muséu dedicáu al xudaísmu de la Edá Media enantes de ser espulsaos y aniquilaos en 1420-21. La entrada al muséu val 10 euros y abre de domingu a xueves de 10 a 18 hores y vienres de 10 a 14 hores. Ver web.

Nes baldoses alredor del monumentu tán grabaes los nomes d’aquellosa sitios onde atoparon la muerte los xudíos austriacos nel réxime nazi.

Caleyando volvemos a Kohlmarkt onde entama Graben, úna de les cais más comerciales de la ciudá.

Siguiendo la cai atopamos la Ilesia de San Pedro, del sieglu XVIII, llevantada onde tuvo la primer ilesia de la ciudá. Destaquen les munches imáxenes de la Virxe, los sarcófagos con restos de mártires, la cúpula y el retablu que representa la curación del paralíticu.  Abre de llunes a vienres de 7 a 20 hores y sábados, domingos y festivos de 9 a 21 hores. La entrada ye gratis. Ver web. ATENCIÓN: Nun s’asustar por atopar na ilesia un retratu d’Escrivá de Balaguer. Ye lo qu’hai.

Si volvemos a Graben atopamos Pestsäule, la columna llevantada en 1679 pa celebrar el final d’una peste.

Tanto esti como tolos caminos del barriu antiguu van hacia la Catedral de San Esteban, que domina la ciudá cola so torre sur de 137 metros d’altor y el rellumante teyáu d’azulexos.

Una placa describe la rellación de Mozart cola catedral. Nomáronlu director musical axuntu poco enantes de morrer; foi la so ilesia parroquial cuando vivía na Casa de Fígaro; casóse equí con Constanze; dos de los sos fíos bautizáronse y el so funeral foi na  Capiella de la Cruz.

De la ilesia orixinal románica nun queden munchos resclavos, la cúpula ye renacentista y l’altar que describe a San Esteban ye barrocu. La entrada ye de baldre; abre de 6 a 22 hores, sacantes los domingos qu’abre a les 7 de la mañana. Ver web.

Frente a la catedral ta Haas Haus, un edificiu de cristal posmodernista que rompe col ambiente del llugar y nel que se reflexa la catedral.

Si siguimos la cai pela qu’entramos a la catedral vamos atopar a la derecha Domgasse onde ta Figarohaus, la única casa de Mozart que se conserva en Viena y onde compuso “Les bodes de Fígaro”. Equí vivió’l músicu tres años cuando taba nel so esplendor tanto social como musical, enantes de cayer nel escaezu. Anguaño ye un muséu municipal de cuatro pisos onde se contestualiza a Mozart, y los sos años vieneses dientro de la so dómina. bre tolos díes de 10 a 19 hores y la entrada val 10 euros. Ver web.

Volviendo a la cai de la que nos desviamos vamos siguila hasta atopar a mano izquierda Lichtensteg que nos va llevar a atopar el reló Anker qu’hai n’Hoher Markt, la plaza más vieya de Viena onde taba’l mercáu y hebo execuciones. El reló axunta dos edificios de la plaza; cada vez que da la hora sal una procesión de personaxes hestóricos, como l’emperador Marco Aurelio, el duque Rodolfo IV o Haydn all son d’una música d’órganu. Convien velu a mediudía ya que ye cuando desfilen tolos personaxes.

Yá tamos mui cerca del Danubio, pero vamos facer una última parada enantes de ver el ríu. Ver mapa pa llegar a Postparkasse, l’edificiu de la Caxa Postal d’Austria obra del arquitectu Otto Wagner, autor del modernismu qu’ehbo en Viena a lo cabero del sieglu XIX. Ye de 1904 y amuésase entá rupturista cola fachada de mármol gris, aluminiu y clavos y escultures. Hai qu’entrar pa ver l’edificiu y el Muséu Postal. Abre de llunes a vienres de 9 a 17 hores y sábados de 10 a 17 hores. La entrada val 6 euros. Ver web.

Y llegamos al ríu al malecón  de Xicu Xosé I onde hai embarcaderos pa visitar el Danubio (información) y un monumentu que recuerda a les víctimes del fascismu.

* De la Ópera al Prater. La ruta entámase na Ópera (U1, U2. Karlsplatz), úna de les más importantes óperes del mundu construyida ente 1861 y 1869. En 1945 sufrió bombardeos qu’acabó con too menos cola fachada principal, la gran escalera y el vestíbulu colos frescos de Schwind. Los trabayos d’igua entamaron poco depués. Una característica distintiva de les representaciones de la Óperaye la esistencia de sitios de pie (“stehplätze”) que, en cada función, puen ser más de 500, y que se vienden a precios muy baxos nuna taquilla especial, namás 90 minutos enantes del entamu de la representación. Dellos d’estos sitios tán allugaos en llugares priviliexaos de la sala, como al fondu del patiu de butaques, jxsto debaxo del antiguu palcu imperial.

Pue facese una visita guiada, en delles llingües, a la Ópera que val 6,5 euros. Los horarios dependen de los espectáculos que vaya a haber, pero asoléyense con tiempu equí. Ver web.

Saliendo de la ópera hai que dir al metro pa garrar U1 hasta Nestroyplatz que nos va llevar a Praterstrasse (númberu 54), a la Casa de Johan Strauss, el maestru de los valses. Equí vivió ente 1863 y 1868 y nella compuso “Danubio azul”. Pue vese’l pianu, parte del moblame orixinal, reliquies de los salones de baille… La entrada val 4 euros y abre de martes a domingos y festivos, de 10 a 13 hores y de 14 a 18 hores. Ver web.

Siguimos pasiando per Praterstrasse pal Norte, p’hacia’l Prater, un parque qu’amás del verde guarda la sorpresa de delles atracciones espectaculares y non vistes per Asturies; hai atracciones que valen 1 euru y hailes muncho más cares como la noria del sieglu XIX dende la que se pue ver toa Viena (9 euros). Ver web.

El Prater abre tolos díes del 15 de marzu al 31 d’ochobre de 10 de la mañana hasta medianueche anque hai atracciones, como la noria, que tán abiertes tol añu. Ver web (conséñense los precios de les atracciones).

* Schönbrunn. Ye la visita que nos queda y pa la que tenemos que salir un poco de la ciudá en metro (U4. Hietzing). Schönbrunn ye la residencia estival de los Habsburgo con unos xardinos y arboledes maraviosos alredor pelos que pasiaba la emperatriz Sisí. Ta nun altu dende’l que se ve tola ciudá. Los xardinos incluin un llaberintu colos signos del zodiacu, un zoo, un arcu al que se pue subir, una fonte dedicada a Neptuno, viveros… Tien un millón de metros cuadraos. Abre dende les  6 al atapecer (n’iviernu dende les 7).

El Palaciu ye barrocu y tien 1.441 cuartos. Equí vivió Napoleón y foi la última casa de Xicu Xosé I. Los cuartos son rococós y nellos tocó, ente otros maestros de la música, Mozart. Amás de los cuartos pue visitase una coleición de xarrés imperiales. Ver web. Les entraes tienen dellos precios, dende 10,5 euros, según lo que se vaya a ver (ver precios). Abre tolos díes.

1 april a 30 xunu 8.30 am a 5.30 pm
1 xunetu a 31 agostu 8.30 am a 6.30 pm
1 setiembre a 31 ochobre 8.30 am a 5.30 pm
1 payares a 31 marzu 8.30 am a 5.00 pm

 

 

 

Anuncios

Acerca de xurdefernandez

Escritor. Profesor d'ESO
Galería | Esta entrada fue publicada en Uncategorized. Guarda el enlace permanente.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s